Nënkryetari i VLEN-it dhe deputeti i Lëvizjes Vetëvendosje në Kuvendin e Republikës së Maqedonisë së Veriut, Bekim Qoku, ka shprehur mbështetjen e tij për protestuesit në Shqipëri, të cilët po kundërshtojnë atë që e konsiderojnë cenim të së drejtës së pronës dhe mungesë transparence në proceset vendimmarrëse.
Përmes një postimi në rrjetet sociale, Qoku theksoi se shqiptarët e Maqedonisë së Veriut ndajnë solidaritetin me qytetarët që po protestojnë në Tiranë, duke e cilësuar të drejtën e pronës si një të drejtë të shenjtë dhe të pacenueshme.
“Atdheu nuk është llogaria bankare e askujt”, shkroi ai, duke shtuar se mbrojtja e pronës nënkupton mbrojtjen e lirisë, dinjitetit dhe sigurisë juridike të çdo qytetari.
Sipas Qokut, kauza për mbrojtjen e pronës dhe të drejtave qytetare meriton mbështetje, ndërsa protestuesit që po ngrejnë zërin për këto çështje nuk janë të vetëm në përpjekjet e tyre. Ai nënvizoi se shqiptarët në Maqedoninë e Veriut qëndrojnë në solidaritet me qytetarët që protestojnë në Shqipëri.
