Gjermania ka ndërmarrë një hap të ri për forcimin e kapaciteteve ushtarake, duke porositur më shumë se 2 mijë automjete transporti ushtarak nga kompania Rheinmetall, në një marrëveshje me vlerë rreth 1 miliard euro.
Sipas njoftimit të kompanisë, kontrata përfshin kamionë logjistikë të pambrojtur në disa variante, përfshirë modelet 4×4, 6×6 dhe 8×8, të destinuara për transport dhe mbështetje operative të forcave të armatosura gjermane. Dorëzimet pritet të nisin në gjysmën e parë të vitit 2026 përmes partneritetit Rheinmetall MAN Military Vehicles.
Kjo blerje është pjesë e strategjisë së qeverisë së kancelarit Friedrich Merz për modernizimin dhe zgjerimin e Bundeswehr-it, në një kohë kur shqetësimet për sigurinë në Evropë janë rritur ndjeshëm. Merz ka kërkuar vazhdimisht rritjen e shpenzimeve ushtarake dhe ndërtimin e “ushtrisë më të fortë konvencionale në Bashkimin Evropian”.
Ndërkohë, shefi i ushtrisë gjermane, gjenerali Carsten Breuer, ka paralajmëruar se Rusia po rindërton fuqinë e saj ushtarake dhe mund të përbëjë një kërcënim serioz për Perëndimin deri në vitin 2029.
Burime nga Ministria e Mbrojtjes gjermane thanë se automjetet e reja do të rrisin aftësinë e Bundeswehr-it për dislokim të shpejtë dhe mbështetje logjistike në operacione ushtarake, duke adresuar mangësitë e kahershme në këtë sektor.
