Ambasadori i BE-së në Kosovë, Aivo Orav, pas takimit të emisarit të BE-së Peter Sorensen me kryeministrin Albin Kurti, ka bërë të ditur se është arritur pajtim për nisjen e zbatimit të Ligjit për të Huajt dhe atij për Automjetet, i shoqëruar me disa masa shtesë përmbajtësore.
Sipas Orav, zbatimi i Ligjit për të Huajt do të nisë nga nesër. Ai theksoi se gjatë javëve të fundit janë zhvilluar bisedime intensive me Qeverinë e Kosovës dhe se sot është arritur marrëveshje për zbatimin e këtij ligji me disa masa shtesë, veçanërisht sa i përket regjistrimit të banorëve serbë të Kosovës dhe personave që kanë leje qëndrimi të përkohshme.
“Jemi përqendruar për zbatimin e ligjit për të huajt, që do të fillojë nga nesër. Kemi pasë bisedime intensive me Qeverinë e Kosovës gjatë javëve të fundit dhe sot është arritur pajtimi zbatimit të Ligjit mbi të Huajt me disa masa përmbajtjesore shtesë, sidomos kur bëhet fjalë për regjistrimin e banorëve serbë të Kosovës dhe personave me leje qëndrimi të përkohshme”.
