Kryeministri i Kosovës, Albin Kurti, ka bërë të ditur se sektori i teknologjisë së informacionit dhe komunikimit (TIK) po shënon rritjen më të shpejtë në ekonominë e vendit, duke u shndërruar në një ndër shtyllat kryesore të zhvillimit ekonomik.
Sipas tij, eksportet e shërbimeve TIK janë rritur me 386 për qind gjatë katër viteve të fundit, ose gati janë pesëfishuar, çka dëshmon potencialin e këtij sektori për t’u bërë motor kyç i rritjes së qëndrueshme ekonomike.
Kurti theksoi se sektori i TIK-ut, së bashku me shërbimet profesionale dhe mbështetëse, kontribuon me rreth 6 për qind në Bruto Produktin Vendor. Ai shtoi se punësimi në teknologji ka efekt multiplikues, duke ndikuar edhe në krijimin e vendeve të reja të punës në sektorë të tjerë të ekonomisë.
Kryeministri bëri të ditur se mbështetja për këtë sektor do të mbetet prioritet i qartë i Qeverisë edhe në mandatin e ardhshëm, veçanërisht përmes Fondit të Inovacionit dhe projektit të Kullës TIK (ICT Tower).
Gjatë vizitës së sotme në Qendrën e Inovacionit në Kosovë (ICK), Kurti u njoftua edhe me Pasqyrën e Ekonomisë Digjitale, të prezantuar nga Data4X./Press7.tv
Statusi i plote:
https://www.facebook.com/share/p/18UV57YrTi/?mibextid=wwXIfr
