Policia e Kosovës ka pezulluar nga puna 11 zyrtarë policorë për trajtimin e rastit të Arlinda Zekajt, që u vra ditë më parë në Vitomiricë të Pejës.
Zekaj u vra më 25 tetor nga ish-kunati i saj, ndërsa vetëm tri ditë më herët u kishte shkruar letër institucioneve duke u treguar se jeta e saj po rrezikohej. Në ditën e vrasjes, ajo pati denoncuar bashkëshortin për kanosje. Pasi ai u ndalua për 48 orë, Policia e ktheu në shtëpi Zekajn e sipas deklaratave të autoriteteve “kjo ndodhi me vetëdëshirë”. Sapo u kthye në shtëpi, Zekaj u qëllua me sëpatë nga ish-kunati.
Tani Policia ka njoftuar për suspendim të zyrtarëve përfshirë ushtruesin e detyrës së drejtorit rajonal të Pejës, shefin e hetimeve rajonale, komandantin e stacionit policor, zëvendëskomandatin, shefin e hetimeve, ushtruesin e detyrës së shefit të sektorit të operativës, komandantin e nënstacionit në Vitomiricë dhe katër hetues policorë.
“Suspendimet janë bërë në interes të hetimeve të pavarura, llogaridhënies institucionale dhe përgjegjësive individuale, në trajtimin e rastit. Policia e Kosovës mbetet e përkushtuar në ruajtjen e vlerave, integritetit dhe shërbimit në mënyrë të drejtë e të paanshme, si dhe do të bashkëpunojë ngushtë me të gjitha institucionet relevante”, thuhet në njoftim të Policisë.
