Ekonomia ruse duket se është në gjendje më të keqe nga sa pranon Kremlini. Sipas një raporti të ‘Financial Times;, shërbimi ushtarak i inteligjencës suedeze ka informacione se lideri i Kremlinit, Vladimir Putin, i manipulon të dhënat ekonomike për të krijuar një imazh të rremë.
Vetë Putin pranoi publikisht për herë të parë javën e kaluar problemet ekonomike. Në një mbledhje të transmetuar në televizionin shtetëror, ai tha se zhvillimi ekonomik është “nën pritshmëritë”, madje edhe nën planet e qeverisë dhe bankës qendrore.
Për janarin dhe shkurtin, Kremlini raportoi një rënie të ekonomisë prej 1.8%. Më i godituri është kompleksi ushtarako-industrial – që deri tani ishte motor i rritjes. Shumë ndërmarrje janë me humbje, të korruptuara dhe të varura nga kreditë e bankave shtetërore.
Sipas kreut të inteligjencës ushtarake suedeze, Thomas Nilsson, edhe këto shifra mund të jenë të zbukuruara. Ai tha për ‘Financial Times’ se ka indikacione se Rusia manipulon sistematikisht të dhënat ekonomike për të fshehur efektet e shpenzimeve të luftës dhe sanksioneve.
Sipas tij, gjendja reale është “edhe më e keqe” se ajo zyrtare.
Ai shtoi se inflacioni në Rusi mund të jetë rreth 15%, shumë më i lartë se 5.86% i deklaruar zyrtarisht. Edhe deficiti buxhetor besohet të jetë më i madh – rreth 30 miliardë dollarë sipas vlerësimeve të Suedisë dhe inteligjencës ushtarake gjermane.
Ekonomia ruse mund të përballet ose me një rënie graduale, ose me një krizë të papritur. Sipas Nilsson: “Kur krijon një sistem si ai i Putinit, ndoshta as ai vetë nuk e di sa e keqe është gjendja reale”.
Megjithëse Rusia po përfiton nga çmimet e larta të naftës – të nxitura edhe nga tensionet në Ngushticën e Hormuzit – dhe po fiton miliarda, kjo nuk mjafton.
Për të mbuluar deficitin buxhetor, sipas Nilsson, çmimi i naftës ruse duhet të qëndrojë mbi 100 dollarë për fuçi për një vit të tërë.
Problemi është “sistematik”: modeli ekonomik i vendit nuk është i qëndrueshëm. “Nuk është rritje e qëndrueshme kur prodhon materiale për luftë që më pas shkatërrohen në fushëbetejë”, theksoi ai.
