Kryetari i Kuvendit të Maqedonisë së Veriut, Afrim Gashi, ka mirëpritur në Shkup kryetaren e Kuvendit të Republikës së Kosovës, Albulena Haxhiu, në kuadër të vizitës së saj të parë zyrtare jashtë vendit në këtë detyrë.
Përmes një statusi, Gashi e ka cilësuar këtë vizitë si një mesazh të miqësisë së sinqertë që lidh të dy vendet.
Gjatë takimit, sipas Gashit, është riafirmuar përkushtimi për thellimin e bashkëpunimit ndërmjet dy parlamenteve, përmes shkëmbimit të përvojave, grupeve të bashkëpunimit dhe forcimit të fqinjësisë së mirë.
Ai ka theksuar gjithashtu se Maqedonia e Veriut do të vazhdojë ta mbështesë Kosovën në anëtarësimin në organizatat shumëpalëshe, si dhe ka shprehur gatishmërinë për bashkëpunim në zbatimin e reformave dhe avancimin e agjendës evropiane të rajonit.
Në fund, Gashi i ka uruar mirëseardhje Haxhiut në Shkup, duke shprehur shpresën se vizita do t’u japë një shtysë të re marrëdhënieve miqësore dhe vëllazërore ndërmjet dy vendeve.
