Presidenti amerikan Donald Trump ka deklaruar për Financial Times se Shtetet e Bashkuara mund të “marrin naftën e Iranit”, duke përmendur edhe mundësinë e marrjes së kontrollit mbi ishullin e rëndësishëm energjetik Kharg.
“Për të qenë i sinqertë, gjëja ime e preferuar është të marr naftën e Iranit, por disa njerëz budallenj në SHBA thonë: ‘Pse po e bën këtë?’ Por ata janë njerëz budallenj”, është shprehur Trump.
Ai ka thënë se një opsion mund të jetë edhe marrja e ishullit Kharg.
“Ndoshta e marrim Kharg Island, ndoshta jo. Kemi shumë opsione,” ka deklaruar ai, duke shtuar se kjo do të nënkuptonte praninë amerikane në ishull për një kohë të gjatë.
I pyetur për mbrojtjen iraniane në ishull, Trump tha: “Nuk mendoj se kanë ndonjë mbrojtje. Mund ta marrim shumë lehtë.”
Deklaratat vijnë në një kohë kur rreth 3,500 trupa amerikane janë dislokuar në Lindjen e Mesme, mes frikës së përshkallëzimit të konfliktit me Iranin, raporton BBC.
Trump ka shtuar gjithashtu se bisedimet indirekte SHBA–Iran, përmes ndërmjetësve pakistanezë, po ecin mirë, por ka refuzuar të flasë për një marrëveshje të mundshme armëpushimi, duke thënë se “një marrëveshje mund të arrihet shpejt”.
