Sipas të dhënave më të fundit të Komisionit Shtetëror të Zgjedhjeve (KSHZ) për pjesëmarrjen deri në orën 17:00, në disa komuna është vërejtur një dalje jashtëzakonisht e ulët e votuesve, për çka ekziston rreziku që atje të mos zgjidhet kryetar komune, raporton “360 Stepeni”.
Në përputhje me nenin 132 të Kodit Zgjedhor, për që procesi zgjedhor të jetë i vlefshëm, sot duhet të votojë të paktën një e treta e votuesve të regjistruar në komunën përkatëse.
“Në raundin e parë të votimit për kryetar komune zgjidhet kandidati që merr shumicën e votave nga votuesit që kanë votuar, nëse në zgjedhje kanë dalë të paktën një e treta e numrit të përgjithshëm të votuesve të regjistruar në listën zgjedhore për komunën përkatëse. Nëse në raundin e parë nuk dalin të paktën një e treta, zgjedhjet përsëriten tërësisht”, thuhet në ligj.
Komunat me pjesëmarrjen më të ulët deri në orën 17:00
Të dhënat e KSHZ-së tregojnë se pjesëmarrja më e ulët është regjistruar në:
• Qendër Zhupë me 19,15%,
• Vrapçisht me 20,94%,
• Mavrovë-Rostushë me 25,89%,
• Gostivar me 28,02%.
Disa komuna afër pragut për zgjedhje të vlefshme
Në komunat Shuto Orizare me 30,38%, Radovish me 31,57% dhe Plasnicë me 32,87%, pjesëmarrja është e ulët, por ekziston mundësia që deri në mbylljen e vendvotimeve të tejkalohet pragu i nevojshëm prej 33,33% në mënyrë që zgjedhjet të jenë të vlefshme.
