Një ngjarje e rëndë, e cila pretendohet se ka ndodhur në territorin e Shqipërisë, ka ngritur pikëpyetje serioze për sigurinë e qytetarëve dhe reagimin e institucioneve shtetërore.
Sipas dëshmisë së Edi Kuçit, automjeti me të cilin udhëtonte është ndaluar në rrugë pasi një grup personash dyshohet se ka keqpërdorur sinjalizime të ngjashme me ato të Policisë. Kuçi pretendon se më pas është rrethuar nga rreth 15 persona, shumica prej tyre të maskuar, dhe është sulmuar fizikisht.
Ai thotë se grupi drejtohej nga Joz Marku dhe se është “shkelur në besë”, duke pretenduar se ndalimi dhe sulmi kanë qenë të parapërgatitur.
Në videon e fundit të publikuar, e cila po qarkullon në rrjetet sociale, dëgjohet një person që pretendohet se është Joz Marku duke kërkuar që ngjarja të filmohet. Pamjet tregojnë përshkallëzimin e konfliktit, ndërsa Edi Kuçi shfaqet me shenja të dukshme lëndimesh dhe gjakderdhjeje.
Materiali filmik dhe pretendimet e të dëmtuarit duhet të verifikohen plotësisht nga organet kompetente. Megjithatë, rasti ngre një pyetje alarmante: Si mund të ndalohen qytetarët apo turistët në rrugët e Shqipërisë përmes keqpërdorimit të sinjalizimeve policore dhe më pas të dhunohen nga një grup personash?
Deri në momentin e publikimit të këtij lajmi, nuk është bërë i ditur ndonjë reagim zyrtar i Policisë së Shtetit lidhur me identifikimin, shoqërimin apo arrestimin e personave të përfshirë. Gjithashtu, nuk dihet nëse është sekuestruar materiali i plotë filmik dhe nëse kanë nisur hetimet për ndalim të paligjshëm, dhunë në grup dhe keqpërdorim të shenjave policore.
Policia dhe Prokuroria duhet të sqarojnë urgjentisht rrethanat e ngjarjes, të identifikojnë çdo person të përfshirë dhe të përcaktojnë përgjegjësinë individuale. Heshtja institucionale vetëm sa shton pasigurinë dhe krijon përshtypjen se grupe të caktuara mund të vendosin “rregullat” e tyre në rrugët e Shqipërisë.
Për respektimin e prezumimit të pafajësisë, pretendimet ndaj Joz Markut dhe personave të tjerë mbeten akuza të pakonfirmuara derisa të verifikohen nga institucionet. Redaksia mbetet e hapur për qëndrimin e tij, të Policisë së Shtetit dhe të çdo pale tjetër të përfshirë.
