Turistja nga Zelanda e Re fillimisht pagoi 1.506 euro për një udhëtim me taksi nga Stacioni Kryesor në Zagreb deri në rrugën Frankopanska, e më pas 150 euro. Rasti u dënua ashpër nga ministri i Turizmit, Tonçi Glavina.
Ndërsa policia po e heton rastin, “24 sata” shkruan se distanca është rreth 1,9 deri në 2 kilometra, varësisht nga rruga e zgjedhur.
“Çmimi me mjetin tonë, nëse distanca është 2 kilometra, është rreth 4 euro dhe ky çmim nuk ndryshon pavarësisht kohës së ditës, kushteve rrugore apo motit”, thotë kompania Taxi 1717.
“Eko Taxi” thekson se udhëtimi përmes kësaj rruge do të kushtonte afërsisht 5,50 euro, në varësi të adresës së saktë dhe kushteve të trafikut.
U kontrolluan edhe çmimet e Bolt dhe Uber në aplikacion. Ato ndryshojnë sipas llojit të makinës së porositur për transport. Çmimi për këtë rrugë varion nga 3,30 euro deri në 6,60 euro për një makinë premium. Nëse do të përdorej Uber për një distancë prej dy kilometrash në qendër të Zagrebit, çmimi do të ishte nga 4,20 deri në 6,36 euro.
“Nëse kjo është bërë qëllimisht, dhe duke gjykuar nga ajo që publikojnë mediat duket se është kështu, për njerëz të tillë absolutisht nuk ka vend në turizmin kroat apo në ofrimin e shërbimeve për turistët vendas ose të huaj. Pres që shoqatat profesionale të reagojnë dhe t’i çrrënjosin këto raste, sepse një sjellje e tillë na shkakton dëm të madh dhe hedh hije mbi punën e dhjetëra mijëra punëtorëve të turizmit që krijojnë imazhin e Kroacisë si një destinacion shumë i mirë dhe si një vend me mikpritës të shkëlqyer”, tha ministri.
Ai gjithashtu shtoi se Enti Kroat i Turizmit është në kontakt me turisten në lidhje me këtë rast dhe do të gjejë mënyrë për ta kompensuar atë.
