Presidenti i Shteteve të Bashkuara të Amerikës, Donald Trump, tha se rezultati i ultimatumit që i dërgoi Iranit në lidhje me termocentralet do të jetë “shumë i mirë”, duke kritikuar vendet e NATO-s për “asgjë” dhe duke paralajmëruar Teheranin për “shkatërrim total”.
Në një intervistë me Kanalin 13 të Izraelit, Trump iu referua luftës me Iranin dhe ultimatumit në lidhje me objektet energjetike të Republikës Islamike, duke deklaruar se pasojat do të dihen së shpejti.
“Së shpejti do të shihni se çfarë do të ndodhë me ultimatumin mbi termocentralet, rezultati do të jetë shumë i mirë”, tha Trump, duke shtuar se do të pasojë “shkatërrimi total i Iranit” dhe se plani do të “funksionojë shkëlqyeshëm”.
Në të njëjtën kohë, ai i dërgoi kritika të ashpra aleancës së NATO-s, duke deklaruar se Aleanca… nuk bëri mjaftueshëm në lidhje me Iranin.
“Vendet e NATO-s nuk po bëjnë asgjë, gjë që është një turp i madh”, tha Trump, duke shtuar se “Irani ka qenë shumë i keq për 47 vjet” dhe tani “po merr ndëshkimin që meriton”.
Më herët gjatë ditës së sotme, Garda Revolucionare e Iranit njoftoi se do ta mbyllte plotësisht Ngushticën e Hormuzit nëse Trump do të vazhdonte kërcënimet për të sulmuar objektet energjetike të Iranit.
Njoftimi zyrtar i Gardës Revolucionare thotë se, në rast të një sulmi amerikan, kompanitë në rajon në të cilat SHBA-ja ka pjesëmarrje do të “shkatërrohen plotësisht”, si edhe se termocentralet në vendet e rajonit ku ka baza amerikane do të bëhen “objektiva legjitime” të sulmeve iraniane
Njoftimi erdhi pasi Trump kërcënoi të “shkatërronte” objektet energjetike të Republikës Islamike nëse Teherani nuk lejon rihapjen e ngushticave brenda 48-orëve.
Shtetet e Bashkuara dhe Izraeli sulmuan Iranin të shtunën, më 28 shkurt , në ato që i quajtën “sulme parandaluese”, të cilat erdhën pas dështimit të raundeve të shumta të negociatave mbi programin bërthamor të Iranit.
Irani më pas nisi sulme masive hakmarrëse kundër Izraelit dhe objektivave të lidhura me SHBA-në në të gjithë rajonin e Lindjes së Mesme.
