Gjykata e Apelit ka hedhur poshtë ankimimet e disa të akuzuarve në lidhje me rastin e tragjedisë së autobusit të kompanisë “Durmo Turs” që ndodhi në vitin 2019, ku humbën jetën 16 pasagjerë dhe mbi 30 të tjerë u plagosën. Dënimet për disa nga të akuzuarit janë rritur, ndërsa disa të tjerë mbajnë ende dënimet e mëparshme.
Dënimi për pronarin e kompanisë “Durmo Turs”, Dërmish Beluli, u rrit nga 4 në 10 vjet burg, dhe për përgjegjësin për transportin në kompani, Remzi Miftari, nga 6 në 10 vjet burg. Po ashtu, dy punonjës të stacionit të kontrollit teknik, Igor Gjorgjevski dhe Goran Dukovski, u dënuan me 7 vjet burg secili, nga 5 vjet sa ishin më parë.
Dënimet për punonjësin e tretë të stacionit të kontrollit teknik, Jane Bovarovski, dhe për shoferin e autobusit, Manoil Trifunovski, mbetën të pandryshuara: 5 dhe 14 vjet burg.
Në seancën publike të Gjykatës së Apelit më 2 prill 2025, pas shqyrtimit të ankimimeve, gjykata shpalli vendimin përfundimtar. Ankimet e të akuzuarve Dërmish Beluli, Igor Gjorgjevski, Goran Dukovski dhe Jane Bovarovski u hodhën poshtë, ndërsa ankimimi i Prokurorisë për Remzi Miftarin dhe Manoil Trifunovskin u miratua pjesërisht, duke rezultuar në ndryshimin e dënimeve.
Gjykata e Apelit gjithashtu pranoi ankimimet e viktimave për kostot e gjykatës, duke i anuluar ato dhe kthyer çështjen për rivlerësim në gjykatën e shkallës së parë.
Sipas vendimit të gjykatës, të akuzuarit nuk kanë respektuar rregullat e sigurisë. Dërmish Beluli dhe Remzi Miftari lejuan që një autobus teknikisht jo i rregullt të merrte pjesë në trafik, duke rrezikuar jetën e pasagjerëve. Po ashtu, punonjësit në stacionin e kontrollit teknik, Igor Gjorgjevski, Goran Dukovski dhe Jane Bovarovski, lejuan që autobusi të kalonte kontrollet teknike pavarësisht mangësive të tij. Shoferi i autobusit, Manoil Trifunovski, duke qenë i vetëdijshëm për defektin e mjetit, nuk e kontrolloi siç duhet dhe shkaktoi aksidentin fatal.
Ky rast ka përfunduar me gjithsej 39 vjet dënim për të akuzuarit, dhe atyre u është ndaluar ushtrimi i profesionit për një periudhë pesëvjeçare.
