Një incident që ka ngjallur reagime ka ndodhur në Bruksel, vetëm një ditë para nisjes së edicionit të dytë të Forumit të Zgjerimit të Bashkimit Evropian (EU Enlargement Forum 2026). Forumi organizohet nga Komisioni Evropian, nën drejtimin e komisionares për Zgjerim, Marta Kos.
Në koncertin e mbrëmjes hapëse, të mbajtur më 15 nëntor, u interpretua kënga patriotike serbe “Oj Kosovo, Kosovo”. Kënga njihet për mesazhet e saj nacionaliste dhe për pretendimet historike e politike serbe ndaj Kosovës. Kjo ndodhi ndërkohë që Kosova nuk kishte asnjë përfaqësues në këtë aktivitet, i cili u kushtohet pikërisht afrimit të vendeve të rajonit me BE-në.
Sipas programit zyrtar, në mbrëmjen kulturore performuan Orkestra e të Rinjve të Ballkanit Perëndimor (Western Balkan Youth Orchestra) dhe grupi slloven “Kapobanda”. Ishte ky i fundit që e solli në skenë këngën e diskutueshme.
Çfarë thotë kënga?
“Oj Kosovo, Kosovo” u shkrua në vitin 1989 nga kompozitori serb Ljubomir Ljuba Manasijeviq, në kohën kur shënohej 600-vjetori i Betejës së Kosovës. Ajo u regjistrua një vit më vonë, më 1990, dhe me kalimin e kohës u bë simbol i diskursit nacionalist serb.
Teksti i saj përmend Graçanicën, Vidovdanin, princin Lazar dhe Millosh Obiliqin. Mesazhi politik është i hapur: Kosova paraqitet si tokë serbe, e cila nuk do të dorëzohet. Një version të këngës e publikoi më 27 qershor 2022 edhe këngëtarja serbe Danica Cërnogorçeviq. Ai shoqërohej me një mesazh të mitropolitit Amfilohije, i cili e quante Kosovën “zemra e zemrës” së popullit serb.
Forumi i Zgjerimit vazhdon më 16 nëntor me fjalimet e presidentes së Komisionit Evropian, Ursula von der Leyen, presidentit të Finlandës, Alexander Stubb, dhe komisionares Marta Kos. Në fokus të diskutimeve janë reformat, siguria dhe bashkëpunimi rajonal.

