Zëvendëskryeministri për Qeverisje të Mirë nga koalicioni VLEN, Arben Fetai, ka reaguar me një status në Facebook lidhur me një zhvillim të rëndësishëm institucional për shqiptarët në Maqedoninë e Veriut.
Fetai ka bërë të ditur se Ligji për Përfaqësim të Drejtë dhe Adekuat po hyn në fazën e realizimit, plot 24 vjet pas Marrëveshjes së Ohrit, duke e cilësuar këtë si një hap të vonuar, por të domosdoshëm drejt barazisë reale në institucionet shtetërore.
Sipas tij, procesi ka marrë edhe vlerësim pozitiv nga Komisioni i Venecias, çka e forcon legjitimitetin dhe standardin evropian të këtij ligji.
Në mesazhin e tij, Fetai thekson se institucionet duhet të fokusohen te puna dhe përgjegjësia, e jo te lojërat dhe spektaklet, duke nënvizuar nevojën për profesionalizëm dhe seriozitet në administratën shtetërore.
Ky zhvillim vlerësohet si një sinjal pozitiv për avancimin e të drejtave të shqiptarëve dhe për zbatimin konkret të parimeve të Marrëveshjes së Ohrit në jetën institucionale të vendit./press7.tv
