Për të pesëmbëdhjetën herë me radhë, deputetët e Kuvendit të Kosovës kanë dështuar ta konstituojnë përbërjen e re parlamentare, të dalë nga zgjedhjet e mbajtura në shkurt. Seanca e fundit, e mbajtur të martën, përfundoi sërish pa ndonjë marrëveshje për zgjedhjen e kryetarit të Kuvendit.
Pengesë kryesore mbetet refuzimi i deputetëve për të formuar një komision që do të mbikëqyrte votimin e fshehtë për kreun e ri të parlamentit – propozim i bërë nga kryesuesi i seancës, Avni Dehari, më 1 maj. Ky mekanizëm është parë si i domosdoshëm pas disa tentimeve të pasuksesshme për zgjedhjen e Albulena Haxhiut, kandidate e Lëvizjes Vetëvendosje (LVV), e cila nuk arriti të sigurojë shumicën prej 61 votash në asnjërin prej votimeve.
Ndërkohë, Aleanca për Ardhmërinë e Kosovës (AAK) e ka çuar çështjen në Gjykatën Kushtetuese, duke kërkuar interpretim për ndryshimin e mënyrës së votimit gjatë procesit për zgjedhjen e kryeparlamentarit. Iniciativa e AAK-së është përkrahur edhe nga PDK-ja, LDK-ja dhe deputetë të tjerë opozitarë.
Në vazhdimin e seancës më 13 maj, partitë opozitare, përfshirë PDK-në, LDK-në, AAK-në dhe Listën Serbe, sërish refuzuan të propozojnë ndonjë përfaqësues për komisionin që do të mundësonte votimin e fshehtë.
Përfaqësues të opozitës kanë akuzuar LVV-në për shkelje të Kushtetutës, duke thënë se mënyra se si po tentohet zhvillimi i votimit të fshehtë është e paligjshme. Deri tani nuk ka ndonjë zgjidhje konkrete në horizont, ndërsa bllokada institucionale vazhdon të thellohet.
