Presidenti amerikan Donald Trump ka njoftuar rritjen e tarifave për çelikun dhe aluminin e importuar nga 25% në 50%, në një përpjekje për të forcuar industrinë vendase dhe për të ulur varësinë nga Kina. Gjatë një tubimi në Pittsburgh, Trump e cilësoi këtë vendim si një masë për mbrojtjen e sigurisë kombëtare, duke theksuar se “pa çelik, nuk ka industri dhe as ushtri”.
Tarifat e reja do të prekin importe nga vende si Kanadaja, Brazili, Meksika dhe Koreja e Jugut. Lëvizja vjen në një kohë kur Trump kritikoi Kinën për shkelje të marrëveshjeve tregtare dhe përshëndeti një investim rekord prej 14 miliardë dollarësh nga kompania japoneze Nippon Steel në SHBA.
Vendimi është pritur me kritika nga Kanadaja dhe Australia, të cilat e kanë cilësuar si të pajustifikuar dhe të dëmshëm për ekonominë e rajonit.
