Zëdhënësja Tami Bruce deklaroi se SHBA po ndryshon “metodologjinë e kontributit të saj” në bisedimet e paqes dhe nuk do të “udhëtojë më nëpër botë sapo të thirret” për takime.
Kievi dhe Moska tani duhet të paraqesin propozime “të qarta dhe konkrete” për t’i dhënë fund luftës dhe të takohen drejtpërdrejt për të zgjidhur konfliktin, shtoi Bruce.
“Ne do të vazhdojmë të ndihmojmë, por nuk do të udhëtojmë më nëpër botë si ndërmjetës për takime”, tha ajo për gazetarët.
“Tani është radha e të dy palëve. Ka ardhur koha që ato të paraqesin dhe të zhvillojnë ide konkrete për t’i dhënë fund këtij konflikti. Kjo do të varet prej tyre.”
Tërheqja e Uashingtonit nga ndërmjetësimi i drejtpërdrejtë vjen pas paralajmërimeve të mëparshme nga SHBA se do të largohej nga procesi i negociatave nëse propozimi i saj për paqe do të refuzohej nga si Ukraina, ashtu edhe Rusia.
Departamenti i Shtetit njoftoi të martën se do të tërhiqet nga roli i ndërmjetësit nëse nuk sheh “propozime konkrete” nga Moska dhe Kievi për t’i dhënë fund konfliktit.
Në fund të muajit të kaluar, nënpresidenti amerikan J.D. Vance deklaroi: “Ne u dhamë një propozim shumë të qartë si rusëve, ashtu edhe ukrainasve, dhe ka ardhur koha që ata të thonë ‘po’, ose SHBA do të tërhiqet nga ky proces.”
