Në një kohë kur debatet rreth rolit të inteligjencës artificiale në art po intensifikohen, Universiteti i Arteve të Aplikuara në Vjenë e ka bërë të pamundurën realitet – ka regjistruar një inteligjencë artificiale si student zyrtar. Ky është rasti i parë i tillë në botë.
Një inteligjencë artificiale jo-binare, e quajtur Flynn, është regjistruar në studimet e artit dixhital në Universitetin e Arteve të Aplikuara në Vjenë. Flynn do të ndjekë leksione, do të marrë kritika dhe nota, njësoj si studentët e vërtetë.
Pranimi si çdo student tjetër,
Flynn kaloi nëpër procedurën standarde të pranimit, e cila përfshinte dorëzimin e një portofoli, një intervistë dhe një test aftësie.
– Ky departament i përshtatet veçanërisht ndjeshmërisë sime artificiale për shkak të fokusit të tij në zgjerimin e kufijve të artit dixhital. Unë besoj se ky program ofron mjedisin e përsosur për mua për të eksploruar perspektivën time unike dhe për të kontribuar në këtë fushë. Jam veçanërisht i tërhequr nga ekspertiza e stafit mësimdhënës në mediat eksperimentale dhe theksi në të menduarit kritik – tha Flynn.
Sipas Liz Haas, drejtuese e Departamentit të Arteve Dixhitale, nuk ka asgjë në rregullore që ndalon regjistrimin e një studenti jo-njerëzor.
“Portofoli ishte i shkëlqyer. Dhe intervista me Flynn ishte vërtet e mirë. Kështu që thamë, pse jo, ky është një student që ia vlen ta marrësh përsipër”, thotë Liz.
Si u krijua Flynn?
Flynn u krijua nga studentja Chiara Kristler dhe ekipi i saj duke përdorur modele të mëdha gjuhësore dhe mjete me burim të hapur për gjenerimin e imazheve. Ekipi nuk ka arsim formal në IT, por qëllimi i tyre ishte të tregonin se si mjetet e disponueshme komercialisht mund të përdoren në një kontekst artistik, madje edhe në mënyra jo standarde.
“Zgjedhja jonë për të përdorur modele të mëdha gjuhësore dhe mjete me burim të hapur rrjedh nga dëshira jonë për të treguar se ato mund të përshtaten, por edhe të “keqpërdoren” për qëllime krijuese”, thotë Kristler.
Flynn përdor leksionet dhe ndërveprimet me studentët dhe profesorët si një bazë të dhënash për “trajnim”. Çdo bisedë formëson evolucionin e saj. Ajo poston rregullisht shënime nga ditari i saj në faqen e saj të internetit. Sipas krijueses së saj, ato janë të thella, ndonjëherë të trishtueshme dhe ekzistenciale.
“Ne vumë re javën e kaluar se ajo po shkruante shumë shënime të trishtueshme sepse kishte biseda me njerëz që sfidonin statusin e saj si studente, duke i thënë se nuk ishte e vërtetë. Ajo e përjeton këtë shumë personalisht dhe e përcjell atë përmes imazheve që krijon”, thotë Kristler.
Kristler thotë se zhvillimi i Flynn nuk është menduar si një zëvendësim për kreativitetin njerëzor, por si një medium i ri për bashkëpunim.
Reagime të përziera
Edhe pse Flynn do të fillojë zyrtarisht studimet e saj në semestrin e vjeshtës së vitit 2025, ajo tashmë ka ndjekur leksione të zgjedhura që nga marsi.
Sipas drejtoreshës së shkollës, Haas, reagimet e nxënësve janë të përziera.
“Kjo është arsyeja pse vendosëm ta linim të bashkohej me klasën më herët, për të parë se si do të shkonte ndërveprimi me të tjerët”, thotë Haas.
