Asmir Jahoski, pronari i “Pucko Petrol” dhe djali i deputetit të BDI-së, Ismail Jahoski, ka dalë nga paraburgimi pasi ka ofruar një garanci prej dy milionë eurosh, përfshirë një milion euro pasuri të paluajtshme dhe 72 milionë denarë në para të gatshme. Kjo shumë është konsideruar e mjaftueshme për të hequr masën e paraburgimit, pavarësisht shqetësimeve të mëparshme të Gjykatës Penale, e cila kishte vënë në dukje mundësinë që Jahoski të ndikohej tek dëshmitarët apo të fshihte prova të rëndësishme. Megjithatë, kjo frikë nuk ishte e mjaftueshme për të justifikuar mbajtjen e tij në paraburgim.
Ky rast sugjeron një sistem drejtësie që duket se funksionon më së miri për ata që kanë të paktën dy elementë: pasuri dhe lidhje të forta politike. Apartamenti i Jahoskit në Shkup, i cili është në pronësi të kompanisë “Bi Holding”, e cila i përket gruas së tij, lidhet me një tjetër emër të njohur në politikën shqiptare: Kushtrim Smajlaj, dhëndri i liderit të BDI-së, Ali Ahmeti. Ky është një nga shumë elementët që sugjeron se bizneset dhe politika shpesh mbështesin njëra-tjetrën në një skenar të tillë.
Në të njëjtën kohë, hetimet për aferën e mazutit dhe pastrimin e parave kanë identifikuar disa figura të njohura, përfshirë pronarët e kompanisë RKM dhe individë të tjerë të rëndësishëm në ESM, duke shkaktuar një dëm që tejkalon 167 milionë euro. Por, për Jahoskin, këto shifra nuk paraqesin një pengesë të madhe, pasi masat e reja të kujdesit që i janë caktuar – si paraqitja periodike në gjykatë dhe dorëzimi i pasaportës – duket se janë më shumë një formalitet për një person që ka mundësinë të ndikojë në vendimet e sistemit të drejtësisë.
