Edhe këtë vit, festa e 1 Majit u bashkua me ditët e fundjavës. Me rastin e fundjavës së zgjatur, shumë qytetarë të Maqedonisë kanë zgjedhur ta kalojnë këtë periudhë jashtë vendit.
Gjendja aktuale në pikat kufitare “Bogorodicë” dhe “Bllacë” paraqet fluks të shtuar të qarkullimit, veçanërisht në drejtim të daljes nga Maqedonia e Veriut. Pamjet nga kamerat e sigurisë tregojnë kolona të gjata automjetesh dhe autobusësh në të gjitha korsitë në pikën kufitare “Bogorodicë”, me makina të pozicionuara shumë afër njëra-tjetrës.
Një situatë e ngjashme është regjistruar edhe në pikën kufitare “Bllacë”, ku është vërejtur rritje e dukshme e numrit të automjeteve që presin për dalje nga vendi. Autoritetet kufitare u bëjnë thirrje qytetarëve të planifikojnë udhëtimet me kohë dhe të marrin parasysh pritjet e mundshme.
