Kryetari i LSDM-së, Venko Filipçe, deklaroi se koalicioni aktual qeverisës është në prag të shpërbërjes dhe se mungesa e një baze të përbashkët e bën të paqëndrueshëm. Duke komentuar tensionet brenda Aleancës për Shqiptarët të udhëhequr nga Arben Taravari, Filipçe tha se “është vetëm çështje kohe kur kjo qeveri do të shpërbëhet”.
Filipçe nuk përjashtoi mundësinë e bashkëpunimit me Bashkimin Demokratik për Integrim (BDI) dhe me vetë Taravarin në zgjedhjet lokale të ardhshme, duke lënë të hapur opsionet për një riformësim të skenës politike.
“Nuk ka ndonjë lidhje thelbësore që i bashkon partitë në këtë koalicion. Situata e brendshme është e brishtë dhe qytetarët e ndjejnë këtë pasiguri,” theksoi ai.
Lideri i LSDM-së gjithashtu përmendi një anketë të brendshme të porositur nga partia e tij, sipas së cilës VMRO-DPMNE po shënon rënie në mbështetje publike. Ai e cilësoi partinë në pushtet si “të dënuar për dështim” dhe shprehu bindjen se ndryshimet janë të pashmangshme.
