Ajola Xoxa, bashkëshortja e kryebashkiakut të arrestuar të Tiranës, Erion Veliaj, është paraqitur paraditen e sotme rreth orës 10:30 në ambientet e Prokurorisë së Posaçme Kundër Krimit të Organizuar dhe Korrupsionit (SPAK), pas një thirrjeje zyrtare nga ky institucion.
Sipas burimeve zyrtare nga SPAK, ndaj Xoxës janë ngritur dyshime të arsyeshme për përfshirje në disa episode korruptive dhe pastrim të produkteve të veprës penale. Konkretisht, ajo akuzohet për korrupsion pasiv të funksionarëve të lartë shtetërorë, pastrim parash dhe deklarim të rremë ose fshehje të pasurisë.
Hetimet paraprake kanë zbuluar se fondet publike të shpërndara nga Bashkia e Tiranës mund të jenë kanalizuar në llogaritë bankare të Ajola Xoxës dhe të familjarëve të saj, përmes shoqatave jofitimprurëse dhe bizneseve të kontrolluara prej tyre. Në kuadër të hetimit janë sekuestruar dy llogari bankare me një vlerë totale prej afro 869 mijë eurosh, si dhe një vilë luksoze 494 m² në zonën e Qerretit, e ndërtuar nga kompania “Agi Kons”.
Gjithashtu, gjatë kontrollit është zbuluar një kasafortë me 95,350 euro dhe 14,900 dollarë, në ambientet e një shoqërie që administronte vetë Xoxa.
Kjo çështje është pjesë e një hetimi më të gjerë që përfshin edhe vetë Erion Veliajn dhe disa përfaqësues të biznesit privat, të akuzuar për korrupsion dhe shpërdorim fondesh publike. Në vijim pritet që gjykata të shqyrtojë kërkesën për lirimin e pasurive të sekuestruara dhe të vendosë për ecurinë e mëtejshme të hetimeve.
Ngjarja ka shkaktuar reagime të forta publike dhe po konsiderohet si një nga rastet më të rënda që ka tronditur opinionin në lidhje me transparencën në qeverisjen vendore.
