Në kuadër të Javës së Lëvizjes, organizata Gratë për VETËVENDOSJE! ka shënuar ditën e saj me një aktivitet të mbajtur pranë liqenit të Ujmanit, ku pjesëmarrëset zhvilluan diskutime, lexime poetike dhe aktivitete reflektuese në një ambient natyror.
Sipas njoftimit, takimi u karakterizua nga diskutime mbi angazhimin e grave në shoqëri dhe politikë, si dhe nga shprehja e mirënjohjes për kontributin e aktivisteve të organizatës.
Ushtruesja e detyrës së Presidentes dhe njëherazi kryetarja e Grave për VETËVENDOSJE!, Albulena Haxhiu, tha se aktiviteti u zhvillua në frymë reflektimi, frymëzimi dhe bashkëbisedimi.
“Patëm diskutime të vlefshme, shprehëm mirënjohje për punën dhe angazhimin e aktivisteve, si dhe lexuam poezi kushtuar grave nga autore vendase dhe të huaja. Një ditë e mbushur me reflektim, frymëzim dhe bashkëbisedim në një nga hapësirat më të bukura të vendit tonë”, ka deklaruar Haxhiu.
Aktiviteti ishte pjesë e organizimeve të Javës së Lëvizjes, që synojnë të promovojnë angazhimin qytetar dhe pjesëmarrjen e grave në jetën publike dhe politike.
